نظامِ حکومت کے حوالے سے ہمارا ماڈل ریاست مدینہ ہے، عمران خان

 اسلام آباد (این این آئی)وزیرِ اعظم عمران خان نے کہا ہے کہ نظامِ حکومت کے حوالے سے ہمارا ماڈل ریاست مدینہ ہے،فلاحی ریاست اور قانون کی بالادستی ریاستِ مدنیہ کے سنہری اصول تھے، حکومت ملک میں انصاف و قانون کی بالادستی مکمل طور پر قائم کرنے کیلئے اقدامات اٹھا رہی ہے۔پیر کو جاری اعلامیہ کے مطابق وزیرِ اعظم عمران خان سے برطانیہ کے ممبرانِ پارلیمنٹ نے ملاقات کی ۔ملاقات میں لارڈ واجد خان، ناز شاہ اور محمد یاسین شامل تھے۔وفد نے وزیرِ اعظم کو اسلام و فوبیا پر آواز بلند کرنے اور ریاستِ مدینہ کی طرز پر پہلی دفعہ معاشی و سماجی طور پر پس ماندہ طبقات کیلئے سماجی تحفظ و تخفیفِ غربت کے اقدامات اٹھانے پر خراجِ تحسین پیش کیا.

اسکے علاوہ آزاد کشمیر میں نو منتخب حکومت کے عوامی فلاح کیلئے اٹھائے گئے اقدامات کی بھی تعریف کی۔ملاقات میں موجودہ حکومت کے مختلف اقدامات، عوام دوست پالیسیوں اور مسئلہ کشمیر کو اجاگر کرنے کے حوالے سے اقدامات پر بات چیت کی گئی۔وزیر اعظم عمران خان نے گفتگو کرتے ہوئے کہا کہ نظامِ حکومت کے حوالے سے ہمارا ماڈل ریاست مدینہ ہے،فلاحی ریاست اور قانون کی بالادستی ریاستِ مدنیہ کے سنہری اصول تھے۔انہوں نے کہاکہ حکومت ملک میں انصاف و قانون کی بالادستی مکمل طور پر قائم کرنے کیلئے اقدامات اٹھا رہی ہے۔انہوں نے کہاکہ معاشرے کی ترقی کیلئے ضروری ہے کہ معاشرے کے ہر طبقے کی ترقی پر توجہ دی جائے۔